Dəniz dalğalı saçlar... sənə küləklərmi sığal çəkər?.. - Məlahət İsmayılqızı yazır

 BİR SU PƏRİSİ TİMSALI

          Bir Su pərisi timsalı... 

    Gözləri dəniz yosunu,

Saçları dəniz dalğası...

    Ey... Su Pərisi, gözlərin dərin qüssə, 

Bənizin nədən belə bəyaz...nur baxışlı gözlərin.

     Hünərli yerişin, güvənli duruşun, 

Bir başqaydı sənin baxışın, sənin  dünyan!

      Ey Su Pərisi!

Zərif əllərin, gur saçların,

     İlahə baxışı, İlahi baxışı...

Dəniz dalğalı saçlar... sənə küləklərmi sığal çəkər?..

      Küləklər, Bakı küləkləri,

Gökcə dəniz rəngli baxışların...

    Ey Su Pərisi !

Nə gözəlliklər var həyat adlı nemətdə,

     Nə səltənətlər var tufanlı dənizlərdə!

Bəs hanı sənin Bəxt adlı gülüşün, sevgin- sevincin...

      Nədən bəxtin belə sönükdü...

  Niyə üzlər səndən belə dönükdü?

     Ey Su Pərisi...

Sandın Su Pərisi olmaq asanmı...

     Gözəl olub yaşamaq asanmı...

Unutdun xəbisləri- müxənnətləri, 

     Ey Gözəllik İlahəsi Su Pərisi!

AlaGözlərin nədən qəmli...

    Axtardığın nə, aradığın nə, gözlədiyin nə?

Gözləmə, gəlməyəcək səni sevənlər!

    Ömrünə- taleyinə nöqtəmi qoyuldu?!.

  Su Pərisi misalındansa,

     Axar bir su, bir bulaq olardın.

Həsrət  ürəkləri dağ suyu ilə söndürərdin!

    Ey Su Pərisi...

  Dənizdən sahilə nədən çıxdın...

      Bəxtini oğurladılar, yığvalını oğurladılar, 

  Səni bir boşluğa yuvarladılar...

      Ey Gökcə dənizin  Su Pərisi...

  Sən o dənizdən ayrı yaşamadın, 

    Elin- oban uçub getmiş...səni qüssələr məhv etmiş!

 Döndün nisgilli bir nağıla...

    Ey Gözəllik İlahəsi  Su Pərisi!

Səndən yosun qoxulu bir nağıl qaldı...

  Ağ Atlı Şahzadə sulara daldı!

      Məlahət İsmayılqızı

 105- nömrəli marşrut, 25. 08. 25. Bakı

P. S. Bəzi Atəşlər yanğılara bənzər, elə o yanğılarla da Atəşlənirsən Su Pərisi!

Mən Mamam xaric bütün sevgilərimdə yanıldım! Əlbəttə, mən istədikləri kimi bir deyiləm. Elə özüməm.