Leyla Valayeva İsrailin aparıcı telekanallarından biri olan Channel 13-ün səhər proqramında çıxış edib

Israildə yaşayan azərbaycanəsilli gənc müğənni Leyla Valayeva İsrailin aparıcı telekanallarından biri olan Channel 13 (Reshet 13)-ün səhər proqramında çıxış edib. Proqramda onun Azərbaycan və İsrail mədəniyyətlərini musiqi vasitəsilə birləşdirən yaradıcılıq fəaliyyəti diqqət mərkəzində olub.
İsraildə anadan olan Leyla Valayeva ailəsində Azərbaycan dili və musiqisi ilə böyüdüyünü, uşaqlıqdan həm Azərbaycan, həm də ivrit dilində mahnılar dinlədiyini bildirib. Onun sözlərinə görə, bu iki mədəniyyətin vəhdəti yaradıcılığının əsas istiqamətini təşkil edir.
Musiqi ilə qurulan mədəni dialoq
Proqram zamanı müğənni Azərbaycan Televiziyasında ivrit dilində ifa etdiyi “Koren Alalin” mahnısından söz açıb. Onun qeyd etdiyinə görə, bu ifa Azərbaycan tamaşaçıları tərəfindən maraq və rəğbətlə qarşılanıb.
Leyla Valayeva Azərbaycan dilində ifasını daha da təkmilləşdirmək məqsədilə musiqi müəllimi Fəridə Mirişova ilə çalışdığını, birlikdə Azərbaycan–İsrail dostluğuna həsr olunmuş yeni bir mahnı üzərində işlədiklərini bildirib. Hazırda bu istiqamətdə yeni yaradıcılıq layihələri davam edir.

Festival səhnələri və yaradıcılıq planları
Müğənni İsraildə fəaliyyət göstərən “Azİz” Dostluq Cəmiyyətinin müxtəlif mədəni layihə və festivallarında iştirak etdiyini, səfirlik və mədəni tədbirlərdə çıxış etdiyini də qeyd edib. Yaxın zamanda Azərbaycana yenidən səfər edəcəyini bildirən Leyla Valayeva televiziya proqramlarında iştirak etməyi və yeni musiqi işlərini təqdim etməyi planlaşdırır.

Azərbaycan haqqında səmimi təəssüratlar
Veriliş zamanı Leyla Valayeva Azərbaycanı qonaqpərvərliyi, isti ailə münasibətləri və tolerant cəmiyyəti ilə seçilən bir ölkə kimi xarakterizə edib. Onun sözlərinə görə, Azərbaycan mədəniyyəti və musiqisi onu yaradıcılıq baxımından daim ruhlandırır.

Canlı ifa və tamaşaçı rəğbəti
Proqramın sonunda müğənni Azərbaycan–İsrail dostluğuna həsr olunmuş mahnını canlı ifa edib. İfa studiyada alqışlarla qarşılanıb. Aparıcılar Leyla Valayevanın səsini və səhnə mədəniyyətini yüksək qiymətləndiriblər.
Hazırda 25 yaşlı Leyla Valayeva yaradıcılıq yolunu musiqi vasitəsilə mədəniyyətlər arasında dialoqu gücləndirməyə yönəltməyi qarşısına məqsəd qoyub.

1001info.az