Əməkdar jurnalist, yazıçı-publisist  Bəxtiyar Qaracanın doğum günüdür

27 mart Azərbaycan jurnalistikasının sanballı və seçilən simalarından biri, yazıçı-publisist, televiziya xadimi, əməkdar jurnalist Bəxtiyar Qaracanın doğum günüdür. O,  milli mətbuatın və televiziya məkanının formalaşmasında yüksək peşəkarlığı, prinsipial mövqeyi və dərin analitik təfəkkürü ilə seçilərək, sözün nüfuzunu qoruyan ziyalı kimi tanınıb. Bəxtiyar Qaraca jurnalistikanı yalnız informasiya vasitəsi deyil, cəmiyyətin mənəvi dayaqlarından biri kimi dəyərləndirən, həqiqətə və obyektivliyə sadiqliyi ilə seçilən qələm sahiblərindəndir.

Onun çoxillik fəaliyyəti mətbuat və televiziya sahəsində məsul vəzifələrlə yanaşı, zəngin yaradıcılıq yolu ilə də səciyyələnir. Publisistik yazıları, televiziya layihələri və sənədli filmləri ictimai fikrin formalaşmasına təsir göstərən, milli yaddaşı yaşadan və oxucunu düşünməyə sövq edən sanballı nümunələrdir.

Azərbaycan Respublikası Prezidentinin 08 oktyabr 2025-ci il tarixli Sərəncamı ilə yenidən Azərbaycan Respublikası Audiovizual Şurasının üzvü təyin olunması onun media sahəsində qazandığı nüfuzun və peşəkar etimadın bariz ifadəsidir. Bəxtiyar Qaracanın milli mətbuatın inkişafındakı xidmətləri dövlət tərəfindən yüksək qiymətləndirilmiş, o, 2010-cu ildə “Tərəqqi” medalı, 2025-ci ildə isə “Əməkdar jurnalist” fəxri adı ilə təltif olunmuşdur.

“Meteor yağışları”, “Yerlə göy arasında”, “İstiqlal düşüncələri” kimi kitablarında müəllifin həyat, zaman və insan haqqında dərin fəlsəfi düşüncələri, milli kimlik və mənəvi dəyərlərə bağlılığı aydın şəkildə əksini tapır. Bununla yanaşı, Bəxtiyar Qaraca incə duyumlu və yüksək poetik təfəkkürə malik şeirlərin müəllifi kimi də seçilir, onun poeziyası oxucunu həm duyğulandırır, həm də düşündürür.

Təmkin, prinsipiallıq və sözə məsuliyyət — Bəxtiyar Qaracanın şəxsiyyətini səciyyələndirən əsas keyfiyyətlərdir. O, həmkarları üçün etibarlı söz sahibi, gənc jurnalistlər üçün isə örnək məktəbdir.

1001info.az bu əlamətdar gün münasibətilə Bəxtiyar Qaracanı səmimi qəlbdən təbrik edir, ona möhkəm cansağlığı, uzun ömür və yeni yaradıcılıq uğurları arzulayır.