Gözəllikdə Göyçəyə bənzədim... Elə taledə də... - Məlahət  İsmayılqızı

  MƏN   GÖYÇƏYƏ   BƏNZƏYİRƏM...

                                            “Mən kimə bənzəyirəm”...

                              Gözəllikdə Göyçəyə bənzədim,
                                     Elə taledə də....

Mən bir az Atama bənziyirəm,
      Mən bir az Anama bənzəyirəm...
Bir az dayılarıma,
                 Bir az əmilərimə,
Bir az Qəndab mamama,
           Bir az Şallı xalama,
Bir az babalarıma,
       Hüseyn babama, Abbas Qağama,
Bir az nənələrimə- 
       Həlimə nənəmə, Məsmə mamama
Göyçənin Ərəbzəngisinə bənzəyirəm!
Mən bir az, bir az...bir az,
     Mən elə Göyçəyə bənzəyirəm,
       Mən Göyçəyəm!
     Göyçək Göyçənin özüyəm.
Əslində Göyçəyə bənzəyirəm...
Göyçənin yaşıl ormanlarına,
    “Qoca Dağ”ına, “Qoşqoruğu”na
Sərin bulaqlarına,
      Dağların lilparına,
       Arx kənarı bitən
               Yarpızlara bənzəyirəm!
       Kəkotu, bənövşə, nərgizli
               dağ yamaclarına bənzəyirəm,
      “Palıdlı”nın bənövşəsinə,
         “Qoşqoruğu”nun lalasına,
      Dərənin calalığına,
               Qarama güllərinə,
         Kərəmin bulağına...bənzəyirəm...
     Sarı Nər ətəyində bitən
          Kəhraba  sünbüllərə bənziyirəm...
     Göy gözlü
          Göyçə gölünə bənzəyirəm.
   Mən elə Göyçəyə bənzəyirəm!
       Mən elə Göyçəyəm,
Göyçək Göyçənin özüyəm,
   Əslində Göyçəyə bənzəyirəm!

                            Məlahət İsmayılqızı

                          AYB- nin və AJB-nin üzvü

                      17. 11. 19. Bakı