MƏN ELƏ GÖYÇƏYƏM!.. - Məlahət İsmayılqızı yazır

            1001info.az "Günün şeiri" rubrikasında   Məlahət İsmayılqızının yaradıcılığına yer ayırıb.

MƏN ELƏ GÖYÇƏYƏM!

               I hissə

“Mən kimə bənzəyirəm – özümə verdiyim sual”...

    Mən kiməm, kim...
   Ən azı Tanrıdan gələn yazı – R. Behrudi

 

Mən bir az Atama bənziyirəm,

  Mən bir az Anama bənziyirəm,

Bir az dayılarıma,

   Bir az əmilərimə,

Bir az Qəndab Mamama,

  Bir az Şallı xalama,

Bir az Babalarıma...

  Hüseyn babama, Abbas Qağama,

Bir az Nənələrimə-

   Həlimə nənəmə, Məsmə Mamama,

Göyçənin Ərəbzəngisinə bənzəyirəm!

   Mən bir az, bir az... bir az,

Mən elə Göyçəyə bənziyirəm!

  Mən Göyçəyəm!

Göyçək Göyçənin özüyəm,

  Əslində Göyçəyə bənziyirəm,

Göyçənin yaşıl ormanlarına,

  “Qoca Dağ”ına, “Qoşqoruğu”na,

Sərin bulaqlarına,

   Dağların lilparına,

      Arx kənarı bitən

Yarpızlara bənziyirəm!

   Kəkotu, bənövşə, nərgizli...

Dağ yamaclarına bənziyirəm!

   “Palıdlı”nın bənövşəsinə,

“Qoşqoruğu”nun lalasına,

   Dərənin calalığına,

Qarama güllərinə,

   Kərəmin bulağına... bənziyirəm!

Sarı Nər ətəyində bitən

   Kəhraba sünbüllərə bənziyirəm!

Göy Gözlü ...

     Göyçə gölünə bənziyirəm,

Mən elə Göyçəyə bənziyirəm,

   Mən elə Göyçəyəm,

Göyçək Göyçənin özüyəm...

  Əslində Göyçəyə bənziyirəm!

                                                     M. İ.  17. 11. 19. Bakı

 

MƏN ELƏ GÖYÇƏYƏM!

           II hissə

 

           Gözəllikdə Göyçəyə bənzədim...  elə taledə də

 

Ələsgərin Sazı- sözüyəm Mən...

    Alagözlü Gözəliyəm Mən,

Alının dərdi- qəmiyəm Mən,

       Atamın Göyçə adlı üsyanı,

   Anamın, Nənə- Babalarımın

Göyçə adlı həsrətiyəm Mən!

    QocaDağdan əsən yellərəm,

Sarı Nərdən gələn karvanın

   Sarvanıyam Mən...

Yarpız, kəkotu, nərgiz,

      Bənövşə ətirli,

Dağ yamaclarıyam Mən!

   Halallıq adlı süfrələrin

Nemətiyəm Mən!

   Göyçə dağlarının

 Solmazgülü  çiçəyi ...

   Bir gün öz yurduna dönəcək...

Ağ saçlı bir Anayam Mən!

   Cığırlarını çayır basan...

Quru tikanını basıb keçərəm,

   O cığırları, o izləri yenidən...

O  Ocaqlara döndərənəm Mən!

  Mən elə Göyçəyəm...

Göyçək Göyçənin özüyəm Mən,

   Eldar İsmayılın Ana həsrətli...

Yanğısıyam Mən!

   Göyçə adlı İlahi sevgiyəm Mən!

Mən elə GÖYÇƏYƏM!

   Göyçək Göyçənin özüyəm,

Əslində Göyçəyə bənziyirəm!

                                                    M. İ. 23. 11. 24 Bakı

 

P. S.  Suya söylədim acılarımı,

            Suda buraxdım dərdlərimi...

         Nə dərd məndən aralı düşdü...

            Nə mən dərddən aralı...                             M. İ.